Kejungnga Ate

KEJUNGNGA ATE

Se Nganggit : Madri Esa Rahman

kejungnga ate ...,

naleka malem pettĕng ta’abarna

adikker ajam nyebut asma’na

duwa nyarepsep dari bigina ate
narama ojan bellas-asena Guste

ngalempodi dalemma tase’ sagatra
sokma anthĕng tarentem

dhalem lampa gulina rassa,

ajalan noro’ gilina dara

anga’-maranga’ ta’ amardha
nanceb daging ngokěr aksara 

dhalemmanna se dalem

aropa dara ta’ arokem

kejungnga ate ...,

ngejung tadha’ gendingan

gendingan tada’ tabbuwan

akasa’ santa’ samubeng raga
raga ngarassa dha’ ka rassana

ngarassa mate dalem odi'na

nyebceb odhi' dalem matena

      

Duh, Guste

ngemmis abdina ....

naleka dapa’ compet bulan arena

ma’refat, daddi petteng pangabasan

panengal, ta’ ngeding macem nye-monyeyan

tareka paneka....

ngemmes neggu’ pancer lema’ tor ennem

ta’ nyebcebi sake’na cabudan

sabab paddang enggunna kennengngan

ngaremmes pello balatra e lengpelengan

agili aeng mata dari kangan-kacerra

erroh kerrong asal kadaddiyanna

asapo’ Allah, atongket Muhammad

nera’e jalan akanta pornama

nojju roma langgeng sajatra

warizan kona ebu tor rama

Guste,

Irhamna bi rahmatika yaa arhamar-raahimien

amin ...

Talango, 2019